[center]
قصيدة كل عين تعشق حليوة لعمنا الكبير احمد فؤاد نجم
كل عين تعشق حليوة وانتي حلوة في كل عين
يا حبيبتي انا قلبي عاشق واسمحيلي بكلمتين
كلمتين يا مصر يمكن هما اخر كلمتين
حد ضامن يمشي امن او مامن يمشي فين
شابة يام الشعر ليلي والجبين شق النهار
والعيون بحرين اماني والخدود عسل ونار
واللوالي في ابتسامتك يحكو اسرار المحار
ياللي ساكنة القصر عالي امتى يهنالي المزار
كلميني يا صبيه طال عليا الانتظار
كلمتين يا مصر يمكن هما اخر كلمتين
حد ضامن يمشي امن او مامن يمشي فين
قصرك المسحور غيلانه اغبى من دود الغيطان
بعد مص الغصن الاخضر ينحتو عضم العيدان
واللي خلى الارض خضرا واللي خلى الدار امان
عاش بجوعه ملو جوفه مات بخوفه من الغيلان
روح الغلبان ما قالشي عن شقى العمر اللي كان
كلمتين يا مصر يمكن هما اخر كلمتين
حد ضامن بمشي امن او مامن يمشي فين
ادي كلمة من عذابي قلتهالك
باقي كلمة من حنيني صنتهالك
عنتهالك جوا جوفي بين ضلوعي في حتة ضلمة
خفت منهم يلمحوها يقتلوها في سكة ضلمة
طول مل يبقى الركب ساير بالبشاير والسنين
يبقى ضامن يمشي امن ويبقى شايف يمشي فين