في البداية اعتقدت ان موضوع كادر المعلمين مشروع جيد لا المعلم بجد مظلوم
ولكنه مشروع الى حد ما ظالم لبعض فئات الشعب الاخرى
ولكن تراجعت عن هذا الراي وحمدت الله انه لم يطبق على الكل لا الكادر في الاخر طلع كدرة للمعلمين ولاحكومة قالت خد عندك
اولا : عايزين المعلمين يملوا استمارات الكادر علشان الامور تكون سليمة ونعرف احنا عايزين كام علشان الميزانية
والمدرس يا عيني علشان غلبان وما صدق حاجة زي دي جري وراح ملا الاستمارات
وقال خلاص العيشة ارتاحت
لكن يا فرحة ما تمت خدها الوزري وطار
الحكومة قالت لا لازم نعرف مين اللى يستاهل الكادر ومين اللى ما يستاهلش
طب يعرفوا ازاي
قالوا هانعمل امتحانات للمدرسين
يانهار ابيض ....؟ هايمتحنوا اللي بيمتحنوا الناس
ايوة هو فيه حد كبير على الامتحانات ولا اية
وبعدين احنا ما بنجمش
المدرسين قالوا وماله طالما الموضوع فيه مصلحة
وراحوا .....وياريتهم ما راحوا
خدوا تريقة من امة لا اله الا الله
اللي يقوللهم ان شاء الله ترجعولنا دور تاني
والطلبة يتوع الكليات اللي شمتان واللي فرحان
واللي يقول بعد ما شاب ودوه الكتاب
ولكن المدرس استحمل وقال كله يهون في سبيل الكادر
والمدرس قال خلاص هارتاح
لكن اكتشفنا في الاخر ان الحكومة كانت بتشتغل المدرسين .........